ليلة مناقشة مشروع تخرجي و مش عارف انام و حصل معايا موقف الصراحة قلت لا كفاية كده لازم اتكلم و اعرف ايه اللي بيحصل ده بالظبط لأن الوضع كده مش كويس و مش عارفله سبب ولا حتى حل
الموضوع ابتدى من سنة اولى , كان في منحة قدمت فيها للمرة التانية الاقي سبب رفضي ليها اني كنت مقدم قبل كده مش لأني مثلا عندي مشكلة في الانجليزي او مستوى ذكائي او مستوى الانجليزي بتاعي , مع اني كنت تطبعت شويه بالنظام التعليم الجامعي و ابتديت اجيب من الاخر مش زي ما كنت داخل و شغل مراجع بقى و الكلام ده فكان بالنسبة ليا اعجوبة اني اتقبل اصلا
تاني موقف حصلي كان في ال ROV اول سنة , سبب خسارتنا اللي خلاني مش مصدق الصراحة ان السلوك ملمّسة مش مظبوطة , الجهاز كان يشتغل في الهوا و اول ما يلمس المياه يخرّف ...
تالت موقف برضه كان في السنة اللي بعدها في ال ROV المرة دي كان معانا من الابرة للصاروخ , بس برضه كان عندنا مشكلة بوظت الدنيا
رابع مشكلة كانت اثناء ما مسكت الكات , للي ميعرفنيش دي اسرة في الجامعة عندنا اتشرفت اني دخلتها سنة 2010 و اتمنى انها تكمل لاخر العمر ان شاء الله
اللي حصل ان في مؤتمر سنوي بنعمله , اجي احجز الاقي القاعة فاضية بعدها بيومين الاقي مناقشة دكتوراه و بكده مقدرش اقولهم ﻷ , ابرم الجامعة كلها مفيش غير حاسبات و معلومات و يوم واحد بعد ما كان يومين , و بكده ده اول سكوب يتعمل يوم واحد , اليوم ده كمان كان سبب لخبطة كتير منها كان في مشاكل في طباعة مجلة الاسرة و كان حوار فعلا يومها , انا لحد دلوقتي مسمي اليوم ده 24 ابريل 2013 يوم النكسة بالنسبة ليا , الحمد لله طلعت منه بأقل الخساير
خامس مشكلة متفرع منها مشاكل كتير بس كلها تبع المشروع
المشروع كان في سنة زي الزفت , افراد التيم كله كان في مزاج غير الطبيعي بتاعه و كله كان بيمر بظروف مش سهلة لكن في الطبيعي الفريق ده ممكن كان يقفل المشروع قبل الترم الاول ما يخلص لكن لعله خير ان شاء الله
مثلا ليلة الكلام عن مشروعنا في ايفينت زويل في الجامعة عندنا , الكهربا تقطع في المعمل بتاع 3 ساعات و احنا بنحضر البرزنتيشن , و رحنا نتكلم عنه في الايفينت الكهربا قطعت قبل ما نطلع نتكلم , ورحنا نتكلم عنه في ال MIE اطلع اتكلم الاقي الكهربا قطعت , و اخيرا الاقي الراجل اللي بيطبع التيشيرت بيقول انه و هو بيطبع تيشيرتات الكهربا قطعت و مكنة الطباعة باظت , لا و مش كده و بس مش لاقيين اي مطبعة تانية تلحقنا , و كمان كام ساعة رايحين نناقش المشروع و غالبا الكهربا هتقطع علينا , انا متوقع كده بنسبة 90% الصراحة.
احلفلكم بإيه مش عارف ايه السبب الصراحة لكن و الله بتبقى نيتي خير و مش عارف ايه السبب ولا ايه الحل , لكن كل اللي بقوله بعد كل موقف من اللي فوق ده بقول "بس انا كويس الحمد لله" , انصح اي حد يعرفني يقطع علاقته معايا حفاظا على حياته :D
لو حد عنده حل للموضوع ده ياريت يبلغني و له جزيل الشكر :D
دمتم بخير دائماً
