دايما لو انت بتفكر في تصرفاتك التلقائية بتسأل ايه الحكمة في التصرف ده او ليه اتعمل كده متعملش حاجة تانية ؟
الموضوع ده ابتديت افكر فيه بقالي تمان سنين من اول اولى ثانوي كان الاختيار ما بين علمي رياضة و علمي علوم. الصراحة الفترة دي مكانتش فارقة معايا اوي علمي علوم من رياضة مكنتش افهم الفرق بينهم اوي لكن مكنتش ولا بحب الاحياء ولا الكمياء فكان لازم اختار. الاختيار بقى اصعب لما اتنين من صحابي دخلوا علمي علوم و كان لازم اختار ساعتها فتوكلت على الله و دخلت علمي رياضة. تخلص السنتين بتوع الثانوي و اجيب 98.4% و كان الكلام على اني ادخل هندسة بترول. طبعا مكنتش افهم الفرق بينهم لكن مكنتش عاوزها لأن اللي كنت اسمع عنه انه فيها كمية كمياء معديتش عليها في حياتك و انتهى الامر ان التنسيق حسم الموضوع ده بانها مجتليش و جتلي هندسة المنصورة. اول سنة اللي هي اعدادي كان سنة التوهان بمعنى الكلمة كانت من ازبل السنين اللي مريت عليها في حياتي ولا عارف فين بيودي على منين و كنت شايف كمية هري و هبل و عبط ملهمش حدود. مكانش ده جو الهندسة اللي كان في دماغي الصراحة لكن قلت اتعامل و قضي وقتك و ركز انت عاوز ايه. جتلي فرصة لمنحة اني اقدم فيها قدمت لكن متقبلتش الحمد لله و كملت السنة بأرفها و بكل ما فيها. جت اللحظة اللي هختار اي قسم و كان تقريبا الاختيار محسوم ما بين يا ميكانيكا باور يا كهربا باور يا اتصالات. بعد مناقشات و مناوشات و رايح جي قلت خلاص يبقى الكلام على ميكانيكا باور و نستحمل رسمها ان شاء الله. يشاء القدر ان كات سكوب 11 الاقيه اتعمل في شهر اربعة قلت احضره اشوف الناس دي بتقول ايه. شفت كمية ناس اول مرة اشوفها في حياتي و كانت الصدفة البحتة اني اقابل احمد سليمان -جاري في الشارع و كان لسه بيتكلم عن NoSQL - قلت بس هو ده اللي هيديني النصيحة اللي هي. خلصت الندوة و لقيته عرفني قعدت اتكلمت معاه و قالي نصيحة سيب الكلية و روح حاسبات و معلومات -طبعا نصيحة غريبة جدا لكن كان معاه حق في جزء لكن مكانش يعرف انها مش فارقة كتير :D - قلت خلاص يبقى عالبركة ندخل حاسبات بس هحاول احول القاهرة او اسكندرية لكن معرفتش للاسف لأن كان معايا مادة و مليش تحويل.قلت خلاص نقضيها هنا و نكمل في الكات اديني بتعامل مع ناس شبه الدماغ بتاعتي. اول اسبوع مكانش طبيعي يعني لو كانوا قاصدين يكرهونا في القسم مكانوش ادونا محاضرات بالمنظر ده . لا و كملت لما عرفت ان تاني دفعة اعدادي معايا في السكشن و انا واخد خلفية عن الناس دي انهم وشهم في الكتاب و ملهمش في الشغل الطبيعي هما احفظ تعدي و خلاص . قلت اللهم لا اعتراض نشوف الدنيا عاملة ازاي. لقيت المنحة تاني اتفتحت قلت اقدم تاني و فعلا قدمت لكن متقبلتش لاني كنت مقدم السنة اللي فاتت قلت بس مصر محتاجاني في حاجة كبيرة. قلت اتعامل مع الناس اللي معايا و خلاص . الصراحة اتعرفت على ناس اول مرة و خصوصا صديق طفولتي عبد الله نحلة كان كمان سافر الزقازيق فكان الموضوع اني مسافر بلد تانية اصلا لكن الحمد لله اتعرفت على شباب تقريبا مش هلاقي زيهم تاني. قعدت الاربع سنين اتعرف عليهم و يتعرفوا عليا و الصراحة ربنا عوضني خير رجالة زي الفل ادب و اخلاق و احترام و كمان شاطرين . و الغريبة ان التاني على الدفعة ده بقينا اصحاب بدرجة مكنتش اتخيلها يمكن اكتر من اخوات كمان :D
من تاريخ الموضوع ده انا قدامي شهر على اني اكون خريج ان شاء الله ... في رحلتي التمان سنين دول اتعرفت على ناس و فارقت ناس لكن ايه الحكمة من وجودي في المكان ده لسه معرفتهاش لكن انا متأكد انها هتكون حاجة حلوة ان شاء الله :D
و حتى هذا السبب ان يظهر ... انا سعيد جدا جدا جدا جدا اني اتعرفت على الناس اللي قابلتهم في الكلية سواء شباب الدفعة او شباب الكات او fun science organization او افراد المشروع ... مش ببالغ لو قلت اني اتمنى معرفتي بالناس دول تدوم طول العمر ان شاء الله
اراكم في مدونة لاحقة ان شاء الله :D
اولا : اينار
ثانيا : القنوات الرياضية هنا في مصر
ثالثا : مواقع التواصل الاجتماعي المصري
الموضوع ده كان عاملي صداع كبير في دماغي من ساعة ما دخلت الكلية لحد دلوقتي و انا متابع العملية ماشية ازاي بما اني في قلب الموضوع بحكم اني مسئول عن اسرة و بقالي اكتر من تلات سنين فيها
خليني ابدأ معاكم بالبوست ده ,
https://www.facebook.com/sahar.elgohary/posts/10151266613983554
انا قريت البوست ده الصراحة حسيت ان في حد - اخيرا - بيفكر بره الصندوق في الموضوع ده , و الصراحة اتكلمت في نقط حادة و في قلب الموضوع عموما
تعريف العمل التطوعي في اطار الجامعة :
باختصار شديد هو احد طرق شكر ربنا لنعم كتير ادهالنا عن طريق اننا بنخصص جزء من وقتنا نديه للي محتاجه . ممكن مثلا انك تساعد في انك تشرح لزمايلك مادة هما مش فاهمينها ده عمل تطوعي انت مش مجبر عليه لكن تحس انه التزام عندك لو تعرف تعمل كده , مثلا تلخص ورق و تديه لزمايلك , ليه اشكال كتير جدا جدا جدا , لكن ايه اللي يحكم اني اعمل النشاط ده و اني معملوش ؟
انا حاططها قاعدة قدامي , حاول تخلي العمل التطوعي بتاعك ده ينمي مهارة فيك . شوف انت ايه اللي ناقص عندك و حاول تنميه بالعمل التطوعي , مثلا واحد مش عارف يشرح خالص مش هيتضرب لو نزل و شرح لصحابه و زمايله علشان ينمي المهارة دي فيه , فيما بعد لما يتناقش مع مديره او زميله في الشغل يعرف يسردله التفاصيل كويس و يركز على ايه و يرمي ايه . مثلا انك تشيل مسئولية بجانب زمايلك لو كنت في كيان او انك تحاول تعمل كيان يفيدك و يفيد الناس اللي فيه و يفيد الناس اللي حواليه . مثلا انك تعرف تتكلم ازاي و انت قاعد في اجتماع و ازاي تنظم اجتماع اصلا . كلها حاجات تقدر تستفيد منها في العمل التطوعي و ببلاش مش هتكلفك حاجة .
اهو اللي انا قلته فوق ده بقى بيستغل اسوأ استغلال , الكلام اللي جي هخبط جامد لكن معلش الحقيقة صادمة:
- بعض الناس يبتدوا يستغلوا الكيان في انهم يوصلوا لاغراض معينة , دعاية لنفسه او مجرد انه يستخدم سلطته على الناس لو هو مديرهم , بتوصل لبعض الاحيان ان ممكن يكون في استفادة ربحية من الموضوع "مع ان ده المفروض عمل تطوعي"
- مفهوم الدعاية الخاطئ تماما و غير مدروس من الناس اللي بتقوم بنشر اعمال الكيان المنتميين ليه , و انا مش بعيب عليهم في النقطة دي لانها مش شغلتهم اصلا و محدش يفكر كل من نشر ايفينت او انه نزل كلم الناس عن كيانه مهما كان ده بقى مسوق او بيعمل دعاية , الموضوع اكبر من كده و اكيييييد مكانش هيبقى بالسهولة دي و يتعمل علم!
- عمل مقابلات للناس اللي هتدخل اي كيان , مع ان المفروض ان ده عمل تطوعي مينفعش ناخد الموضوع انه داخل شركة و نشوف هو بيعرف يعمل ايه و ايه اللي ممكن يفيدنا فيه
- بقيت بشوف ناس لمجرد انه انضم لكيان تطوعي يقوم محول نفسه اكنها دي شركته و يبتدي يتقمص دور الموظف فيها , مع ان ده المفروض عمل مش اساسي ليك يعني مش هيجيبلك فلوس في الاخر
- مواضيع الايفينتات او المؤتمرات بقت هي هياها من سنتين ورا , و لو حد عاوزهم انا ممكن اقولهاله موضوع موضوع
- بعض الكيانات متبنية افكار بعيدة عن هندسة نهائيا زي ريادة الاعمال و التنمية البشرية و معروف ان علم التنمية البشرية في مصر عامل ازاي و مين رواده , و انا شخصيا مش معترف بيه كعلم ولا حتى انه يتكتب عنه كلمة واحدة , و علم ريادة الاعمال اعتقد ناس تتعد على الصوابع اللي فاهمة هو بيتكلم عن ايه !
- استغلال حاجة الطلبة لانهم محتاجين للمادة اللي بيقدمها الكيان بشتى الطرق
- الروتينية اللي اتنقلت من المؤسسات الحكومية للكيانات دي و بتبان في طريقتهم في الادارة لو حد دخل جديد او تنظيم لحدث جديد
تنويه : لو انت هتزعل من الكلام اللي فوق ده , اعتبرني مقلتوش خالص عملا بالمثل " انصح صاحبك من الصبح للظهر , لو مقتنعش اكذب عليه بقية اليوم"
البقاء لله في كل واحد مات في احداث ماتش الاهلي و المصري و ربنا يصبر اهله على مصيبتهم
البقاء لله في العدل اللي بقينا بنسمع عنه في الكتب
البقاء لله في الاخلاق اللي بقت عملة نادرة
حاجات كتيرة ماتت فينا من زمان , لكن انا كنت بقول قشطة و نستنى البلد عاوزة تتزق لقدام و الناس دي متظاهرة علشان ليها حق و اكيد مجلس الشعب هيعدل الامور و يجيب الحقوق , لكن شكلها في الخطة الالفية الجاية ان شاء الله
لكن توصل في ماتش كورة و تقريبا مع فرقة -مع احترامي ليها- مش فارق معاها دوري بقدر انها تكون في الدوري اصلا
في ماتش لا كان هيجيب الدوري ولا كان هيخلي المصري بطل افريقيا
و الاكتر من ده و ده انه طالع كسبان , يعني معنى ذلك انك بتعمل ده منظرة مثلا ؟ فرد عضلات و تقول انك دكر و بتعمل و بتسوي
احب اقولك ان اللي عملت فيه ده صدقني لو كان عامل حسابه مكنتش هتعرف تقف قصاده , ده التراس اهلي اللي اتعمل قبل ما انت تفكر تشجع فرقتك , مع اني شاكك انهم يعملوها اصلا هما اه كان ليهم دور بس مش الدور الرئيسي
التراس اهلاوي اتعمل و كان ورا الاهلي في كل مكان و ده كان كل ذنبه امبارح , ماسك شمروخ و بغني اهلي
دي البداية بتاعة موضوعنا النهاردة , لسه لسه
دلوقتي قلنا البقاء لله و الحمد لله 74 شهيد و 200 و حبة مصابين , الحمد لله انهم جات على اد كده
اه اصل انا حزب كنبة و كده تمام يا جماعة حرام عليكم مينفعش كده سيبوا المشير يحكم بقى حرام عليكم و يسبك محكمة مبارك كده علشان لما يطلعه مبارك ميكونش حد زعلان , اصله اتحاكم قانوني
سيبوا المشير علشان يقتل فينا كمان , اصل احنا بقينا اكتر من 80 ميلون و بقينا عبء عليه
سيبوا المشير علشان يطلع يقول دي احداث بتحصل في كل دولة -عادي- و جوزيف بلاتر يطلع يقول ده يوم اسود في تاريخ الكرة
سيبوا المشير علشان خلى ليفربول و برشلونة و الترجي التونسي يعلنوا حدادهم على اللي حصل , لا الصراحة شايف شغله
فالح بس انك تستقبل اللعيبة , تقول تصريحات متأخرة لا تودي ولا تجيب , لولا اني محترم كنت فقدت اعصابي
خلصنا امبارح و نايمين متنكدين و حالتنا طين و طلعت قرارات يمكن انا مشفتش كمية القرارات اللي طلعت دي من ايام الثورة
1-ايقاف نشاط الاهلي الرياضي
2- اعتذار الاهلي عن ماتشات الفريق في بورسعيد
3-المشير بكل حنكة و ذكاء "اجل" الدوري لاجل غير مسمى
طبعا احنا عارفين اهمية النشاط الكروي في مصر و الحمد لله مرة واحدة طلعنا كاس عالم و كانت تقريبا قبل ما اتولد
للعلم انا مواليد 92
4-الزمالك انسحب من ماتشه مع الاسماعيلي
طول عمري بقول الرجال بتتعرف عند وقت الشدة
الحقيقة ده اللي فوق ده كوم و رد فعل الاعلام ده كوم تاني
بجد انا محتاج افقد اعصابي في الجزء ده , يارب اعرف امسك نفسي
اولا: الاعلامي المحايد بطريقة فظيعة احمد شوبير
ضاعت هيبة الشرطة
يعني كل ده همك , و اللي ماتوا قشطة يعني ؟
كان كل همه ان دول جماهير همج , تقريبا شايل موضوع ان ده ممكن يكون مدبر او ان مفيش حد من الامن اتحرك
سطر كامل من الامن المركزي يسد عين الشمس و واقف مبيتحركش
تاني واحد : المعلم الكبير مرتضى منصور
بالصدفة كنت بتفرج على التلفزيون و شفته
من احد مقتطفاته , الثوار النضاف اللي على حق انا متصور معاهم يوم 25 و 28 يناير
هو نزل في الثورة اصلا ؟
ولا جايبين واحد ممثل اتحاد الكورة مع وائل الابراشي , بيلف و يدور على اللوايح و القوانين
تحس انه جي يقول اتحاد الكورة ده ملوش ذنب و فلة شمعة منورة
ولا لما وائل الابراشي جاب مسئول الامن عن مدينة بورسعيد
ملعون ابو المسئولية اللي عنده
يقوله مسئولية مين يقوله و انا مالي انا فوجئت ان سور الملعب منخفض
مسئول امن مدينة بورسعيد , و ماتش الاهلي و المصري
حد يشتم بدالي
كان نفسي اتفرج على توفيق عكاشة الصراحة و تعليقه لكن موفقنيش الحظ , يلا انا شفت كفاية الصراحة
بس بجد على قد ما انا محبط و زعلان اوي من جوايا , لكن فرحان ان التراس اهلي و التراس زمالك اتحدوا مع بعض علشان يجيبوا حق اللي ماتوا , و الدكر اللي يعرف يوقفهم . لازم حل يتقدملهم او بمعنى اصح اللي بيطلبوه
غير كده كمان احب احيي مجلس الشعب المنتخب على قراراته المفترية اللي اتاخدت , لجنة تقصي حقائق !
و زي ما كان في ناس "زي الفل" اللي هما فوق دول ,
كان في ناس محترمة الصراحة جدا
ابراهيم عبد الجواد , اللي من الناس اللي بتحاول ترضي ضميرها و تقول كلمة حق
عجبني جدا كلامه , ربنا يحميه
ده اللي في دماغي حاليا , مفيش حاجة في دماغي غير الناس اللي ماتت و الناس دعاة الاستقرار , صدقوني لو حد من ولادكم اخد بس غرزتين في ايده بسبب حادثة بسيطة الدنيا هتقوم مش هتقعد مش انه 74 واحد يموتوا !
حسبي الله و نعم الوكيل
اه نسيت احطلكم فيديو المناضل الجامد اوي احمد شوبير اللي وصلت ليه , الباقي مش عارف اوصله الصراحة و هي كده كده اكيد انتم شوفتوها
ولا اقوللكم , فيديو من قناة التت افيد
ولا بلاش , محتواها اقذر من اني ارفعه