و انا كنت راجع من المنصورة كعادتي كل يوم (انا طالب في كلية هندسة جامعة المنصورة و ساكن في المحلة) و راكب علبة السردين المعتادة , سرحت في مرة في الكلمة دي ... لعله خير
هبتدي الموضوع من سنتين ورا بالظبط , يعني لما كنت داخل الكلية لسه جديد
بالصدفة ماما عادي بتفتح الجورنال بتاع الجمعة , بصت شافت اعلان لمنحة لماليزيا ... طبعا قالتلي عليها و روح قدم و يا صابت يا خابت
, الصراحة الفكرة دخلت دماغي و حضرت ورقها و اتصلوا بيا و قالولي تعالى اتفضل عندك امتحان كمان يومين مهارات , للي ميعرفش بتبقى عادة انجليزي و IQ و رياضة
المهم رحت , اول امتحان كان انجليزي و الحمد لله كان مستوايا يؤهلني اني اخلصه في نص ساعة مع انه كان متحددله ساعة و كمان في ناس كتير مخللصتوش , 13 صفحة و كمان حاجات لطيفة جدا اوي يعني :D
المهم , عدى الامتحان ده و هو و اللي بعديه و اللي بعديه و روحت
طبعا كنت مروح كنت مذهول من اللي امتحنته ده , كان اول مرة امتحن بالمنظر ده و كانت حاجات ممتعة , بالظبط بعدها بيومين اتصلوا و قالوا في مقابلة مع وفد من الجامعة
طبعا انا طرت من الفرحة و قلت بس كده الموضوع شكله هيتم ان شاء الله
لما رحت , اول اليوم كان غريب جدا و كأن ربنا بيقوللي ملكش نصيب المرة دي من اول اليوم
رايح منمتش ساعتين على بعض , لقيت ناس بيتكلموا انجليزي بطريقة تخلي الواحد يشك انه يعرف يتكلم عربي , غير كده تقريبا مشفتش في اليوم اللي كنت فيه واحد من جامعة اقاليم
المهم هديت نفسي و حاولت اتمالك اعصابي , لكن الصراحة مقدرتش اقاوم نفسي قدام القهوة و الشاي و النسكافيه , كأني فتحت قهوة ليا علشان اعرف اتكلم
المهم جه دوري و دخلت اتكلمت , طبعا كانت اول مرة اتكلم انجليزي ف كنت تقيل جدا لكن في الاخر فهموا انا عاوز ايه لكن طبعا مكانش يرضيهم , المهم ان سببي في المنحة دي كان غريب جدا , اني كنت مبحبش الكميا اللي كنت باخدها و عاوز امشي من الكلية علشان مدرسهاش ! :D
و طبعا النتيجة اني اترفضت , لكن رجعت و قلت لعله خير , اصلا كنت ناوي على ميكانيكا و دلوقتي انا في قسم حاسبات
و اتيحت ليا الفرصة اني تاني اني اقدم فيها , بنفس الخطوات اللي فوق و رحت وصلت لحد المقابلة , الصراحة سبحان الله المرة دي كانت اسهل بكتير من المرة اللي قبلها و كنت بتكلم انجليزي احسن من الاول بكتير سبحان الله
لكن برضه مطلعتش , لاني كنت مقدم السنة اللي فاتت
قلت عادي , مفيش مشكلة زعلت شويه لكن قلت هبقى كويس و هتتنسي التجربة
برضه جتلي اوقات اني احول قسمي لان الصراحة شفت كمية احباط في اول اسبوع يكفوا مصر كلها ايام ما كنا كسبانين الجزائر 4-0
لكن قلت لا استنى و اصبر هشوف حاجة حلوة ان شاء الله و هتحاول تعمل حاجة
لكن اكتشفت اني مش شايف مجالي كويس هنا , اكتشفت اني معايا كنز و انا مش حاسس بيه
اكتشفت ان كمبيوتر و انترنت كافيين اوي انهم يخلوني ستيف جوبز
او ممكن يخلوني عمرو حاحا حسب ما انا عاوز
الموضوع فيا بس انا عاوز ايه , وايه اللي يوصلني لهدفي , بغض النظر عن الجامعة بغض النظر عن القسم
دلوقتي الواحد الحمد لله ماشي كويس في مجاله , لسه موصلتش لحاجة بس ان شاء الله قريب هوصل للي انا عاوزه , متعرف على ناس كافيين انهم يساعدوني في اي حاجة و الحمد لله مبيبخلوش على اي حد باي معلومة و دي ميزة مهمة جدا انك تكون في مجتمع مش منفسن
الحمد لله ربنا عوضني عن اللي شفته لحد دلوقتي من اول ما دخلت هندسة :D ,
ربنا يسهل و ربنا يعوضني عن السؤال اللي جاوبته غلط و كانت اجابته موجودة جنبه و محدش يسألني عملت كده ليه :D
