"داين... تُدان"
كلمتين بساط , بس لو ركزت فيهم هتلاقيهم اسلوب حياة...
حطهم قدامك في كل تصرفاتك و انت هتلاقي نفسك بتفكر 100 مرة قبل ما تيجي تعمل حاجة - هتعاكس واحدة ماشية في الشارع هتلاقي اللي يعاكس اختك او يعاكس مراتك و برضه و مش هتعرف تعمل حاجة ساعتها , هتشرب سجاير و هتتعب عيلتك معاك هييجي ابنك يشرب سجاير و هيتعبك معاه , هتعمل مقلب في حد تعرفه تأكد انه هيترد عليك , تسكت عن ناس اتقتلت الناس برضه الناس هتسكت لما تيجي تتحط في موقف زي ده -
مرورا بتلات سنين تخبط و ارتباك في صفوف الشعب المصري من بعد ثورة يناير 2011 لحد دلوقتي حصل فيها كمية دم مش قليلة , و كله كان بيختتم بجنازة و مواساة اهالي الشهداء و مفيش قصاص و نظريات التخوين بتطلع , لا و بيوصل لعبارات "هما ايه اللي وداهم هناك", "دول شوية بلطجية مأجورين", "عاوزين عجلة الانتاج تمشي" , "البلد بتولع" متناسيين ان اللي بيتقتل ده و الله في الاول و في الاخر "مصري"
دي بس نبذة عن اللي حصل من اول 2012 في الاعتصامات لحد النهاردة:
2 مايو 2012:
أعمال عنف جرت يوم 2 مايو 2012 في منطقة العباسية، وقع فيها أكثر من 11 قتيلًا وعشرات الجرحى من طرف المتظاهرين، ومجند بالقوات المسلحة، بحسب مصادر أمنية وطبية، وقد جرت اشتباكات في ميدان العباسية بين معتصمين و«مسلحين مجهولين»، حيث هاجم المسلحون المعتصمين، الذين كانوا معتصمين بالقرب من مقر وزارة الدفاع للمطالبة بتسليم السلطة للمدنيين وإلغاء مادة تحصن لجنة انتخابات الرئاسة من الطعن. وقد تدخّل الجيش المصري بعدد من حاملات الجنود المدرعة لوقف الاشتباكات، معلنًا أنّه لن يفضّ الاعتصام.
موقف الساسة اللي كانوا موجودين على الساحة كلهم ادانوا اللي حصل و انه مدبر و منافي للعملية الديمقراطية في البلد
النتيجة : جنازات للي ماتوا , و مواساة اهالي اللي ماتوا , و ينضافوا على قايمة شهداء الثورة
5 اغسطس 2012:
قتل مالا يقل عن 15 جنديا مصريا وأصيب العشرات أثناء تناولهم طعام الإفطار وأعلن الحداد في جميع أنحاء الجمهورية وبدأت قوات الجيش بحملات تمشيط واسعة في سيناء للقبض علي الجناة
النتيجة: حداد على التلفزيون , جنازة عسكرية
17 نوفمبر 2012:
اليوم ده انا مش هنساه , كنت نايم و صاحي على صوت صريخ ان الاهلي كسب كأس افريقيا , في حين ان كان في اتوبيس اطفال الصبح مخبوط من قطر و راح فيه ضحايا كتير - و ده يدل على اننا فقدنا آدميتنا من زمان ! - 49 طفل ماتوا ربنا يصبر اهلهم و يعوضهم خير ان شاء الله
النتيجة: استقالة وزير النقل و رئيس السكة الحديد
5 ديسمبر 2012:
اعتصام الاتحادية - كان في شهر محرم يعني شهر حرام فيه القتال - راح فيها 8 اشخاص من مؤيدين الرئيس و معارضينه
النتيجة : الرئيس خطب خطبة انا مفهمتش منها كلمة غير انه عمل حظر تجول , و مفيش اي حاجة حصلت بعدها
لحد يوم قبل 28 يونيو كانت دي الصاعقة , تحس ان بلطجية البلد كلها بقت بتفهم في السياسة و نازلة فاهمة ان الاخوان هي السبب في كل اللي كان بيحصل , كانوا معبأين من الاخوان لدرجة انهم كانوا بيعتدوا على اي حد يشكوا فيه انه اخواني او سلفي , و النتيجة سقوط ضحايا و الله اعلم هيقف نزيف الدم ده.
الاحداث اللي فوق دي انا عاوز كل واحد يقرا يشوف رد فعل كل الاطراف و هو هيعرف معنى "داين... تُدان" كويس , و يعرف ان اللي بيرضى بأن الدم ينزل لمجرد انهم كانوا شوية بلطجية دمه برضه هيهدر لنفس السبب .
و على فكرة , انا مش تبع اي تيار و مليش اي انتماء سياسي لأنها ببساطة لعبة قذرة و مينفعش فيها انك تكون اخلاق و اسهل ما فيها المتاجرة بالدم , انا مجرد شخص مستني الشخص اللي هيهتم باحوال الناس البسطاء و يوفر لقمة العيش و الحياة بحرية و كرامة للناس اللي كل املهم في الحياة كده , مش يقعد يقول الدستور اولا لا البرلمان اولا لا لازم نعزل الفلول لازم نطهر القضاء .......
و في الاخر احب افكركم بشخص اكيد انتم نسيتوه , لمجرد انه مكانش منتمي لأي تيار ولا حتى كمل تعليمه , اتمنى انكم تفتكروه في دعائكم
